كتاب الف نيله و نيله ●● جااااااااااااااااااااامد

قادنى حظى السىء كالعاده ان استقل سياره يقودها سائق ( رغاى ) ، جسلت وسالته على العنوان المطلوب قاللى طبعا اعرفه يا استاذ و ( اللى يسأل ميتوهش ) ، وكان ذلك اول مثل شعبى يستشهد به السائق خلال حديثه معى ، نظر الى نظره ثاقبه وتنهد تنهيدة الخبير المحنك فى الحياه ، وقال: واضح انك مثقف يا استاذ ، نظرت اليه بنظرة المندهش ، وسالته وكيف عرفت هذا ؟! رد بصوت الواثق : شكلك باين والنضاره اللى لابسها واضح انك بتحب القرايه وراح ضارب المثل التانى ( اللى ميشوفش من الغربال يبقى اعمى )، قولتله فعلا وتبسمت ابتسامه خبيثه لا تخلو من السخريه حيث اننى كنت ارتدى نضاره شمسيه للوقايه من اشعة الشمس ولا تمت بأى صله لتلك التى تستخدم فى القراءه .
احس السائق بالسخريه فى نظراتى له حين يتحدث ، نظر لي معاتبا وقال : يا استاذ انت متعلم اه وانا مبفكش الخط بس وراح ضارب المثل الثالث ( العلم فى الراس مش فى الكراس) ، و انا الدنيا علمتنى كل حاجه و هما المتعلمين عملوا ايه للبلد ( خربوها لا مؤاخذه ) هنا بدأت الاهتمام بحديثه وسألته مداعبا (( وهما مين اللى خربوها )) راح باصص يمين وشمال رغم انه لا يوجد غيرنا بالسياره وقال: ((الحكومه يا استاذ )) وبدأ حديثه يأخذ مسارا اخر متجها نحو السياسه ، وتابع حديثه قائلا بس احنا العيب فينا ، احنا اللى نستاهل ناخد على قفانا
، قولتله ازاى يا اسطى انت مش قولت الحكومه هى اللى خربتها ، يبقى العيب فينا ازاى ؟؟ هنا قام بالاستشهاد بالمثل الرابع ( قال يا فرعون مين فرعنك ..) وقاللى يا استاذ احنا عشان شعب على نياته هما بيسرقونا وبيعملوا ما بدالهم واحنا لو فكرنا نسرقهم بيسجنونا ، وتابع قائلا : والله يا استاذ احنا شعب طيب بس اهبل مش عارف حقوقه ، هنا قاطعت حديثه قائلا: طيب تعرف يا اسطى انت ايه هى حقوقك ، قاللى طبعا يا استاذ ( ربنا عرفوه بالعقل ) ، انا حقوقى كتييييييير ، حقى لما اتعب الاقى مستشفى اتعالج فيها بامكانياتى من غير ما اموت من الاهمال ، وحقى انى انزل فرن العيش اشترى بكرامتى وامشى من غير اهانات وخناقات وضرب ، وحقى انى اكل لحمه هما اللى بياكلوها احسن مننا قى ايه ، وفيها ايه كمان لو فى عز الحر اللى احنا فيها ده اخد ام العيال ونطلع على مارينا ، ونظر الى مازحا انت اكيد يا استاذ بتروح مارينا ؟؟ قولتله سيبك من مارينا وكمل عايز اعرف ايه هى الحقوق اللى انت محروم منها ولا كده خلاص ؟؟ قاللى خلاص ايه يا استاذ ده انا لسه هقول واقول ، قالها وقد ترغرغت عينيه بالدموع وبدا حديثه يدخل منحنى اخر ملىء بالهموم والمشاكل والحزن ، قال: حقى يا استاذ لما العيد ييجى اجيب لعيالى هدمه جديده يلبسوها يتعايقوا بيها قدام صحابهم ، حقى لما الواد سيد ابنى الصغير يقولى عايز اشترى حاجه حلوه احط ايدى فى جيبى واديلوا اللى هو عايزه ، حقى لما الجو يبرد شويه اروح بيتى وادفا مفضلش الف طول الليل فى البرد عشان كام جنيه مش مكفيين عيش حاف ، حقى يا استاذ انى اتعامل باحترام واحس انى بنى ادم مش حيوان ، مش انا يوقفونى فى الكمين واخد مخالفات والباشاوات بتوع الملاكى يعدوا ولا فى دماغهم ، حقى لما اعجز شويه الاقى مصدر رزق انا وعيالى نصرف منه ، هنا داعبت الدموع عين السائق وقال: ده انا يااستاذ من فتره تعبت شويه ورقدت فى البيت اسبوع ، مكنتش لاقى اكل انا وعيالى وصاحب التاكسى ركب سواق تانى ع التاكسى ، الدنيا خلاص مبقاش فى رحمه ، وهاجمنى قائلا انت ليه قلبت عليا المواجع يا شيخ ، منهم لله بقى اللى خربوها ولا بيفهموا فى سياسه ولا نيله البلد هتضيع وهما بيتفرجوا ، هنا سألته سؤالا خبيثا : وانت يا اسطى لو كنت مكانهم كنت هتعمل ايه ، فاجأنى هذا السائق باجابه لم اكن اتوقعها ، رد قائلا : انا امنية حياتى يا استاذ ابقى رئيس جمهوريه البلد محتاجه واحد ابن بلد يحكمها مش واحد ابن (( تيييييت)) ، لما استطع التحكم فى نفسى واخرجت ضحكه عاليه كنت احتاجها لتغيير جو الحزن المخيم على المكان ، وتابعت قائلا : وانت يا اسطى لو بقيت رئيس هتحل مشاكل البلد ازاى ؟؟ قال: بالاستيراد والتصدير !! سألته متعجبا وكيف هذا ؟؟ قاللى هصدر الشعب المصرى لاى بلد تانيه مش عايزهم دول مينفعونيش الغلابه دول انا عايز ناس فايقه تعرف تبنى البلد من اول وجديد ، وبعدين بقى هستورد ناس من بره واعمل شعب جديد يكون عارف اللى ليه واللى عليه شعب شكله حلو كده عشان حتى نحسن النسل ، ياراجل شوف الستات بقوا شبه الرجاله ده انا من كام يوم كان راكب معايا زبونه عندها شعر فى دقنها يا راجل , والساده المسئولين بقى دول يومهم اسود معايا هجمعهم فى ميدان عام (( الكلام ده على مسئولية السواق طبعا )) وهخلى الناس تحدفهم بالطوب عشان يبقوا عبره ، ولا اقولك هبعتهم اسرائيل يمكن يعرفوا يخربوها زى ماخربوا بلدهم ، هنا صدرت منى كلمه واحده انهت الثائر : على جنب يا اسطى

فى العام الحادى والعشرين بعد الالف الثانيه الميلاديه (2021م) ، وبعد فشل بنى الانس فى حل المشاكل المستعصيه ، وبعدما ضعفت قواه وانهمك فى حروب داخليه وخارجيه لا تغير من السىء الا ان تجعله اسوأ ، واصبح الضعيف اضعف مما كان والقوى اصبح اقوى و زاد افتراء ، وحلم الوحده اصبح مستحيلا .

قرر المجلس الاعلى للحيوانات الذى يزعمه (خنزائور شنخر) ملك مملكة الخنازير( ومقرها دولة خنزرائيل ) التضامن مع المجلس الاعلى للطيور برئاسة كوكو واوا ديك البرابر زعيم مملكة الطيور ( ومقرها الولايات المتحدة الكتاكيتيه)، وتكوين قوة عظمى واحتلال العالم وتسخير بنى الانس لخدمتهم .

وقد شجبت ونددت كالعاده جامعة الدول العربيه وارسلت خطابا شديد اللهجه ( حصلنا الرعب ) ، فى حين ان بعض الملوك العرب كانوا منهمكين فى حروب داخليه للسيطره على الحكم ، والبعض الاخر فى المستشفيات يجرون بعض العمليات التجميليه للتغلب على مظاهر الشيخوخه التى تأتى بعد المائه عام من صمم نسبى وصعوبه فى النطق وضعف نظر ... الخ

بينما وقفت دول الاتحاد الاوروبى فى موقف محايد وارسلت مندوبين دوبلوماسيين للتفاوض مع الاتحاد الجديد للوصول لحل امثل يريح جميع الاطراف.

هذا وقد خيم الصمت على قارة اسيا ماعدا بعض دول الاتحاد الخليجى حيث صرح الشيخ عدنان بن حبهان ان بلاده على اتم الاستعداد لتمويل اتحاد الطيور والحيوانات بالبترول مقابل السلام ، وانه فى انتظار باقى الامراء حين عودتهم من المصايف فى اوروبا للتفاوض فى الامر( صباح الانتخه ).

وفى تسجيل ارسله على شريط فيديو هدد زعيم القاعده ( بن لادن ) وتوعد الخنازير بتنظيف زرايبهم ( ملحوظه الخنزائريين يموتوا من النضافه ويعشقوا الزباله) وهدد ايضا بنتف ريش الطيورعلى حد قوله.

وعلى صعيد اخر فى حديث صحفى للشيخ حسن نصرالله زعيم حزب الله هدد الشيخ بصفه مباشره جمهورية مصر العربيه وتوعدها ان لم تتدخل لحل هذا النزاع سيدخل الى القاهره ويدمرها تدميرا ( طار بايت ).

وفى مفاجأه ادهشت الجميع تركت دول شرق آسيا وعلى راسها الصين المعركه ، وانشغلوا بتصنيع اجنحه وريش دهب وشباشب ب 3 اصابع وفرش اسنان صغيره فى حجم مناقير الطيور ، وعلب زباله مغلفه لعرضها على مجلس اتحاد الطيور والخنازير والاستفاده من الازمه ماديا !!!

شعب طيب هاتو السكينة

وادبحولكم مليون راس

العبوا فى اعضاء اهالينا

افصلوا الجسم عن الراس

ادبحوا الحلم اللى فينا

واعملوا جلودنا مداس

احنا شعب ولاد لذينا

وانتوا ناس ولاد ناس


بس حاسبوا ع العيال

يمكن فى يوم يكبروا

يفهموا ويبقوا رجال

وع الحلم جايز يقدروا


انزلوا شوارع المدينه

بالعساكر والحراس

اسرقوا النور من عنينا

واقتلوا فينا الحماس

ورثونا زى تركه

غرقونا فى اى بركه

احرقونا فى قطر سكه

اجزرونا من الاساس


بس حاسبوا ع العيال

يمكن فى يوم يكبروا

يفهموا ويبقوا رجال

وع الحلم جايز يقدروا

انتظروا خطاااااااااااااااااابى الى الريس فى الجزء القادم واللى عايز يقول حاجة للريس يبقى يقولهالة

انتى قمرى ومحبوبى

انتى قدرى ومكتوبى

يا ام العيون السمرا

جايلك شايل دبدوبى

يارب تحنى وتدوبى

من شكل الورده الحمرا

-------------------------
وبعد انتظار عام كامل جاء يوم 14 فبراير - اليوم الاحمر - من جديد ، لا اكون مبالغا حين اطلقت عليه لقب اليوم الاحمر ، انظر الى البنات وقد تقمصن شخصية ذات الرداء الاحمر- ما اجمل البنات وهى حمراء يارب العيد ده يفضل على طول – ولكن الشىء الاغرب فى يوم الحب هوالدبدوب ، كلنا شوفنا الدب فى حديقة الحيوان ورأينا كم هو حيوان مفترس و مخيف ، كيف اصبح رمزا للحب .

والجدير بالذكر ان اخواننا الحبيبه فى اليوم ده يفعلون كل مابوسعهم للتعبير عن الحب دون اى مراعاه لشعور اخوانهم السينجل اللى انا واحد منهم ، ورغم انى انسان طيب وبحب السعاده للناس كلها فى اليوم ده بحس بحقد وغيره شديده .

واذكر اننى دخلت محل من محلات الهدايا من باب الفضول لاتعرف على الدبدوب ( اصل انا محدش جابلى دبدوب هديه قبل كده) المره الوحيده اللى حبيت فيها كانت من طرف واحد يعنى مكنش فيها دباديب ولا ورود ، كان اخرى يوم عيد الحب اتخيل يا ترى هيجيلى دبدوب فى يوم من الايام ولا مكتوب عليا اعيش من غير دباديب طول حياتى.

لذا قررت اروح اشترى دبدوب لنفسى يوم عيد الحب وايه المشكله انا بحبنى واتمنى اسعدنى عشان كده هجيبلى دبدوب ، هنا كانت المفاجأه لم اجد فى المحل غير شكل واحد من الدباديب ومعجبنيش واكتشفت انهم بيقولوا دبدوب على كل اللعب يعنى كلب ماشى كتكوت ماشى ميكى ماوس ماشى تويتى ماشى وتعبت مع البائع جدا ، اقوله حضرتك انا عايز دبدوب يفرجنى على كلب وعليه قلب احمر ، يا حاج عايز دبدوب يفرجنى على كرومبو لابس احمر ، ابوس ايدك يا حاج انا نفسى فى دبدوب عشان الحب قاللى انا كده فهمت طلبك يا بشمهندز ( ايوه قالها بشمهندز مش بشمهندس ) وراح جابلى قطتين حاضنين بعض وبينهم قلب احمر، خرجت من المحل وانا حزين بعدما فقدت حلم حصولى على دبدوب الحب .

قولت انا مش هروح وانا زعلان لازم اجيبلى هديه افرحنى بيها روحت داخل على محل ورد قولت اجيب ورد انا كمان محدش جابلى ورد قبل كده ، قابلت فى المحل اكثر البائعين كوميديه ، اول ما شافنى قاللى اتفضل يا برنس الليالى ، انا مش عارف هو قاللى كده ليه يمكن عشان كنا بليل طب ليه برنس !! المهم ابتسمت وقولتله عايز بوكيه ورد على زوقك كده يعبر عن الحب ، غمزلى وقاللى انت هتقدمه لمين ؟؟ استغربت جدا وقولتله تفرق معاك ؟؟ قال طبعا يا برنس يعنى لو لخطيبتك تفرق عن مراتك تفرق عن الموزه بتاعتك ، قولتله موزه ؟!! لا ياسيدى الورد ده لحد غالى عندى وبحبه جدا وطبعا خبيت عليه انى هقدم الورد ده لنفسى ، مكونتش هخلص من لسانه ، قاللى طلبك عندى يا بشمهندز ( قالها بشمهندز زى بائع الدباديب ) هنا تشائمت وقولت برنس الليالى كانت احسن ، جمع بوكيه من الورود المختلفه بس الوانها لم تكن متناسقه ولفها بغلاف احمر ووضع فيونكه حمراء ايضا ، سألته عن السعر قال 320 جنيه بس ، مقدرتش امسك نفسى وقولتله حتى الاستغلال والجشع وصل للحب كمان ارحمونا بقى ، وتركت المحل من غير ما اشترى لقيت البائع اللذيذ بينده : يا برنس يابرنس روح اشتريلها دبدوب ارخص ، ابتسمت وقولت بس هى تيجى ومفيش حاجه تغلى عليها