نصائح للراغبين بالزواج(للرجال فقط)

معالش يا اولاد الموضوع طويل شويه بس بصراهم يستاهل

يارب يعجبكم

اولا العروسة
• الوزن 50 كجم الحد الأقصى انا عارفك طفس بتحبها طويلة بيضاء رشيقة كل ده مش مهم كلها سنة واحدة بعد الجواز وكله حيبقى شبه كله اسود (حينسوا كريم فير اند لفلى ) وتخيين (انت ونصيبك وكل واحد على قد نيته) وقصير ( صدقنى حتى الطوال بعد الجواز بيقصروا حاجة ربانى يعنى) ولو مش مصدقنى اسأل اى حد متجوز بص له بس انت حتعرفه على طول حتلاقيه ماشى موطى فى الأرض و دمعة فى عينيه اديله منديل وخد رأيه وانا متأكد انه حينصحك بس أوعى تعيط جنبه دورك فى العياط لسه ما جاش –

• دقق قوى فى عيلتها واتأكد ان ما فيهاش واحد محامى يكون قاريبها –جارها- صاحب أخوها أحسن ولا مؤأخذة حتبقى فضيحتك بجلاجل وتلاقى نفسك مع أول مشكلة : مخلوع وتلاقى الناس فى الشارع بيشاوروا عليك وبيضحكوا وتلاقى ولادك بيتشتموا ويتقال لهم يا ولاد المخلوع

• أبوها مهم جدا أبوها نصيحتى بلاش يكون موظف –قاعد فى البيت ليل نهار- والعملية مش ناقصة وطبعا بلاش رجال الأعمال انت مش ناقص اللى عنيهم زايغة على السكرتيرات واموال البنوك واوعى تفكر فى اللى مسافر بره حتبقى قرابيزك كلها مع حماتك –يا عينى عليك – وبلاش كمان يكون اعمال حرة او صاحب محل مباحث التموين مش سايبه حد فى حاله وبعدين انت حتخطب وللا حتجرى ورا ابوها فى الأقسام

أبوها : أزاى تعرف من أول مقابلة مع ابوها انه راجل كويس او لأ ؟؟ أول ما تقعد معاه وتطلب أيد بنته حيعمل حاجة من أثنين :

الأولى : حيوطى على ايدك يبوسها ( وده معناه انه راجل محترم وعارف قيمة بنته ومصايبها وعارف قيمة العريس اللى جاى يخطب فى الزمن المهبب ده وعارف معنى ان واحدة حتغور من وشه بس خللى بالك احنا فى موسم الأوكازيونات احسن يطمع و يفاوضك تاخذ عروستين بدل واحدة ويعمل لك خصم على الثانية ) وممكن كمان يدعى لك ان ربنا يصبرك على ما سيبتليك به كما صبره هو على بلواه وسيظل يؤكد انه بيشترى راجل واللى عاوز يشترى يدفع وللا ايه ؟؟


الثاني : حيحط رجل على رجل ويقولك ايوه يا بنى انت قولتللى بتشتغل ايه ؟؟؟ وبعدين عشرين تلاتين سؤال وانت مغمن عليك
لأ لأ بالراحة كده وأعقل انا مش عاوزك ترد على طول – أفهم الأول- نسبة البنات الى الولاد فى مصر بقت 156 الى 134 يعنى لو كل الشباب اتجوزوا ودة مستحيل طبعا لأن لسه فى شباب عندهم عقل مش زى ناس !! وربنا يكملهم بعقلهم حيفضل 22 بنت من كل 156 من غير جواز فهمت . أتقل بقى. العرايس على قفا من يشيل ولا مواخذه انت قفاك حيستحمل ايه وللا ايه –وآآآآآه يا قفايا- وساعتها حيبقى قدامك رد من اثنين :

الأول : ايه ده يا عمى هوه انا أخطب وللا جاى اتسأل ؟؟ وبعين السؤال ده صعب قوى ممكن اتصل بصديق ؟؟وللا نحذف سؤالين ؟؟ هوه أنت ما تعرفشى انا مين وللا ايه ؟؟ العصر بتاع الأسئلة دى كان زمان يا عمى احنا فى عصر كاميرا النت فاهم حاجة يا باشا ؟؟؟؟ عموما انا حاسيب لك ال إى مييل بتاعى أبقى ابعت لى مييل . وكفى الله المؤمنين القتال .انت شكلك طيب ومش وش بهدلة . والحمد لله اللى انقذك من الحفرة اللى انا رايحلها برجليك .

الرد الثانى (لا انصح به مطلقا ) : يا عمى انا مخلص الكلية من خمس سنين والحمد لله كنت بأوفر كل مليم كان أبويا بيدهولى مصروفى طول السنين الخمسة الماضية وقدرت اعمل جمعية واجهز ثمن الشبكة والخطوبة صحيح مش حتبقى خطوبة كبيرة بس ان شاء الله فى الفرح حنعمل زيطة وزمبليطة وحنوزع حتتين جاتوه وساندوتش بسطرمة على كل المعزوميين وفى هذه الحالة سوف تجد نفسك امام سيل من الأسئلة البايخة مثل : أفهم من كده انت ما عندكشى شقة ؟؟ ولا اشتريت الأجهزة الكهربائية ولا الكمبيوتر ابو مايك وكاميرا يا عينى عليكى يا بنتى عاوزينى أجوزك من غير شات وماسنجر وبعدين ايه قصة حوشت مصروفك هوه انت ما بتشتغلشى أتفضل يا فندى----- ماترد يا فالح مالك كده هنجت ليه ؟ ماهو دى أخرة الدخلة الغلط وطبعا انت الجلالة حتاخدك وتقول اتعارك و اخد حقى بذراعى والنتيجة زى كل خناقة كام رباط ضاغط وشوية علامات زرقا فى وشك اللى بقى شكله وحش وحش

نصائح عامة لأول لقاء مع والدها :
• بلاش نظام البدل وبلاش نظام جيل الشعر المعفن ده وبلاش كمان الجينز المقطع وبلاش حد من اهلك يروح معاك اول مرة خليها حلوة .كلمة من هنا وملاية تتفرش من هناك حتبقى سلطة وبعد اول زيارة مش حتقدر تغمض عينيك ( من الوجع طبعا)
• بلاش نظام الشيكولاته الغالية والجاتوهات الفخمة اول زيارة – انا عارفك سخى وصريف( قال يعنى من جيبك مش من جيب ابوك)- خليهم تالت رابع زيارة ان كان فى. ماهو مش معقول نتشتم وندفع وللا انت رأيك ايه؟؟؟
• بلاش تشرب اى حاجة عندهم اول زيارة لأن ناس كتير كانت عاقلة وبعد ما شربت راحت شربت من كعانهم بقية عمرهم
• بلاش نظام مكالمة صاحبك اللى انت مرتبها معاه وانت قاعد مع ابوها يتصل بيك ويقولك الف مبروك العملية ام نص مليون جنيه رست عليك –بقت قديمة دور على حاجة تانية-
• لو ابو العروسة قام شوية ماتقلقشى حتلاقى قدامه شوية مواعيين عاوز يغسلهم او حتتين غسيل مستعجليين عليهم وطبعا لا داعى للأحراج عند عودته عندما تجد أثار الصابون على يده –كلنا لها -


ان اء الله لو سمعت كلامي ده بازن الله ربنا هايسهل لك على طول

ماتخافش بس بصراحة انتا لو سمعت كلامي يبقى ربنا بيحبك

يا سلام ع النصايح