بسم الله الرحمن الرحيم
( مع الاعتزار لحسن )
لو جبت اي مسؤول معفن او نضيف...كبير او صغير....تقولو : يا فندم هو ليه الاتوبيس اتفجر !!؟ ؟
يقولك اصل مصر لها خصوصيتها.....
مش عارف فين الخصوصيه في كده
وهات اي حاجه بقي .....هتلاقي مصر لها خصوصيتها
بس بلاش مسؤولين خالص
تعالي اقولك بعض الخصوصيات
الحلوه والوحشه
مصر لها خصوصيتها
المكروباص : من خصوصيات مصر الوحيده..ان لما تركب مكروباص..لازم يسمع مطرب شعبي معفن
بيغني لاي حاجه...وفي الاغلب بيكون طارق الشيخ...وتلاقي المكروباص معلي...وعمال يزمر مع الاغنيه
-------
غضب ربنا : من خصوصيات مصر والشعب المصري..لو اي حاجه بتحصل .يبقي غضب ربنا..وبس يا معلم سيب الموضوع كده
الواد وقع من البلكونه..." ده غضب من ربنا " ...يعني هو كده نزل الامر الالهي...الواد اتشال من علي الارض بقوه خفيه...اتاخد من البلكونه ووقع ......مينفعش يبقي الواد مثل عمال يمشي علي السور..وقع...لا هو غضب من ربنا وخلاص
------
الكوره :من خصوصيات مصر فيها تمانين مليون مدرب كوره
كل واحد قاعد علي القهوه....لازم يحلل الماتش...ويحلل دم...ويحلل $%# ....
ويقولك ...ايه المدرب ابن ال " #$#%^#^ " منزل الواد حنكش..ومطلع سيد بره....وهو حنكش ينفع ينزل خط وسط ..ده مدرب ابن ستين "$%%^$#%^" ..مدرب وحش ..- اصله مؤدب شويه -
--------
اطباء مصر ( الشعب وليس الاطباء الحقيقين ) :
من خصوصيات مصر والشعب المصري...الشعب كله دكاتره
الواد عنده اسهال..جارتكوا تقولك " خد اسبوتيز " حلو وبيعمل مفعول
البنت عندها برد " خدي كتافلام" - بتاع السنان - ...سبحان الله
--------
التناكه المصريه :
من خصوصيات مصر ..وخصوصا البنت المصريه ....التناكه
في موضوع للدكتور شريف عرفه...كاتب
المواصفات القياسيه للبنت المصريه
1 - التناكه
اما الصفه التانيه
فهي : التناكه بردو
البنت المصريه بتمتاز بالتناكه......مش عارف ليه ......حتي لو وحشه بتبقي تنكه بردو
اموت واعرف سبب....الي هيقري مقال الدكتور شريف هيعرف
هي بتبقي حساك وحش همجي وعايز اغراض خبيثه...فلازم تتنك عليك
ولو انت راكب بي ام دبلو " ام سته " كوبيه ..لونها برتقاني ." شوف الفجر "
هتعتبرك من حثاله الشعب..وان هيا نازلي هانم
بالنسبه للرجاله : في تناكه بردو .......بس مش زي البنات
بس بردو في رجاله تحب تتنك ..علي اساس ان دي حاجه من اساسيات الرجوله
مش عارف ليه الشعب مبيتعاملش مع بعضو عادي كده
الراجل يقولك " انت هتصاحبني ولا ايه "
والتناكه دي من اهم خصوصيات مصر
--------
عيش عيشه اهلك .. :
من اهم خصوصيات مصر ...ان محدش بيفكر يبقي احسن......" يا عم عيش عيشه اهلك "
طب يا عمي طور من نفسك شويه ..أتعلم مش عارف ايه
" يا عم هو احنا هنأمرك .....عيش عيشه اهلك " خلينا كده .." مستوره مدام بابنا عليها مقفول بالترباس "
--------
تقوله حاجه يخشلك في حته تانيه خالص :
العنوان غريب انا عارف...بس انا كنت كاتبها في مقاله تانيه اسمها : افقع متخلفين المجتمع
وهي باختصار شديد...تبقي انت جاي تشيل ورقه من علي الارض تحطها في الزباله " نضافه "
يجي واحد يقولك.......خلاص....سبت الزباله الي في مصر كلها ..وجي تشيلي دي
" مش فاهم انا يعني امسك وزاره الزباله يعني عشان ارضي سعادتك"
ومره الشيخ خالد الجندي بيحكي....ان الشيخ بتاعه ..كان قاعد يعلم ناس حواليه الطهاره
فجه واحد قاله .... " الامريكان طلعوا القمر.....هاه .....القمر....وانتوا قاعدين بتتعلمولي في الطهاره..ده الي احنا فالحين فيه "
راح شيخ الشيخ خالد الجندي رادد عليه وقايله " احنا والامريكان احسن منك .......لا انت طلعت القمر ...ولا منك اتعلمت الطهاره "
--------
في النهايه ..اقول..ان مصر زي ما ليها خصوصيات فقيعه....فيها بردو خصوصيات حلوه
بس مش هقولهاكم...
عشان من خصوصيات مصر ..في النقاد الساخرين الي زيي كده
انه يسخر من الموضوع ويقعد يشتم ويسب في البلد وميقدمش اي حاجه مفيده في الاخر
الأحد مارس 24, 2013 7:38 pm من طرف BOOODY
موضوع: مصر ليها خصوصيتها.. ( سلمتها يا ام حسن) مصري 
