خد ياريس عايزك في كلمتين(مجرد حلم)

بص يا ريس انا لا ليا في السياسة ولا افهم فيها ولا في اي حاجه من الحاجات بتاعتكم دي.... وعلشان كده انا وباقي المصريين قررنا اننا نعينك عندنا علشان تقوم بالمهمة دي...

ودلوقتي انا كمصري وصاحب ارض ليا الحق اني اتكلم معاك واحاسبك...ايوه احاسبك...مش حقولك فلوس البلد فين بس هاقولك فين مصر يا ريس!!! مصر اللي سبناها ليك امانة .... علشان ترعاها وتعليها لفوق !!! فين التقدم اللي عملناه !!! بقالك كام سنه في الحكم عملت ايه غير السلام !!! انا معاك انها مش حاجه سهلة ولكن انت اهتميت بالسلام و ولعت في الباقي

فين كرامتنا !!!! فين حقنا !!!! فين اسمنا كمصرين !!!!وديتها فين انت وغيرك !!! بص يا ريس انا عايش بره مصر احب ابشرك ان في دول الخليج و دول كتيره تانيه عربيه بقينا بنتشتم بالمصري يعني تعمل حاجه غلط يقولك "ما انت مصري" او "خد يا مصري" الالعن من كده يا ريس ان الناس بقت بتتنرفز لما حد يقولها كده !!!

شفت المصيبه !!! يعني انا اقول ما انت مصري ترد تقولي بس ماتقولش مصري !!! خلاص الناس بقت حاسه ان جنسيتهم شتيمه !!!

فين كرامتنا بين الدول ؟؟ بلاش فين كرامتنا جوه بلادنا !!! الناس اللي مشغلنهم عندنا علشان يخدوا بالهم مننا بيموتوا فينا !!!!

انت عندك شركه جايب افراد امن يحرسوها وتلاقيهم داخلين طالعين نازلين ضرب في الموظفين ويقولك اجراءات امنيه !!! وعلشان امن البلد

امن ايه يا ريس هاحكيلك كام موقف واحكم انت.....طبعا حالي زي حال باقي الشباب انا بشرب حشيش ومن زمان يا ريس وكل ما اتمسك ياخدوا مني الحشيش ويمشوني علشان مايعملوش محضر لان مابيكونش معايا كميه لاني كييف مش تاجر

اخر ما زهقت يا ريس اتصاحبت على الظابط ومن يومها بقيت بشرب حشيش ببلاش واحياناً بجيب منه..... ويقولك امن البلد

طبعا كله دلوقتي هايقولك خربان وبيهيس والحشيش لحس دماغه بس ده الواقع واللي بيحصل....

امن ايه يا ريس اللي يخلي واحد زي الله يرحمه خالد سعيد يتضرب لحد ما يموت !!!!! والبجاحه يقولك مات مخنوق ومنتهى الاستخفاف بعقول الناس يقولك دي صورة بعد التشريح انا اعرف دكاتره كتير ولا دكتور ودكتوره قالولي ان حد ممكن يشرح جثه كده بالعكس كلهم اجمعوا ان لو ده تشريح بالجزار اللي شرحه كان قصده ينتقم منه.....

هاتقولي الشهود هاقولك انا اعرف ناس صحابي في امن الدولة دخلت هناك في زياره وشفت الناس هناك بيحصل فيها ايه الواحد هناك ممكن يعترف بأي حاجه يا ريس أي حاجه بمعنى الكلمة

يكفي ان صاحبي بيقولي و احنا خارجين قاللي انت من القلائل اللي بيدخلوا ويطلعوا من الباب ده!!!!

فين حقنا يا ريس !!!!! كمصرين بني أدميين !!!! فين يا ريس احترامي بين العالم والله ليهم حق يبهدلونا ما دمنا احنا بنتهان في بلدنا .....

يا ريس هقولك على حاجه زي مانت عارف انا شغال بره وعايش بره لما بنزل مصر واي ظابط يكلمني مابتكلمش مصري مش علشان حاجه غير اني احس انه بيحترمني

عملتلنا ايه يا ريس في موضوع الجزائر !!!! سمعت منك الكلمتين في التلفزيون وقمت وسقفتلك وقلت يا زين ماخترت يابني انت وكل المصريين متأخره شويه يا ريس بس مش مشكله المهم ان الخطوه هتتاخد وابص الاقي حقنا بيرجع لكن للأسف طلعتوا كالعاده بتنيمونا ياريس

في البلد اللي انا فيها حصلت مشكله كبيره وكان فيها خطوره على كل المقيمين جميع السفارات اتصلت بالمواطنين وعرفوهم يعملوا ايه في حالة الطوارئ اتفاجئت بالموضوع ده ان كل صاحبي غير المصريين جاتلهم مكالمات من السفارات الا المصريين رحت السفاره بعد ما انا اتصلت بيهم اسألهم ومبيردوش قلتلهم ايه يا جماعه مش المفروض تتصلوا بينا تنبهونا وتعرفونا نعمل ايه !!! دي السفاره الهندية اتصلت بالناس قالي يا بيه هانتصل بمين ولا مين !!!

قولي انت عملنا ايه في موضوع المصري اللي اتمثل بجثته في لبنان والجزائر واللي حصلنا في السودان
فين كرامتي كمصري وكمان انسان مش ده برضه حقي ولا في دي انا كمان غلطان
زمان كنا مصريين دلوقتي بيتقال علينا خاينين ومصرئيليين ايه يا ريس لامتى هنفضل كده ساكتين ؟؟؟

هاقولك ايه ياريس مانت عارف قاعد معانا وعايش وشايف والله ما فارق معايا مين اللي يمسك بعدك جمال علاء ولا غيرهم مش عايز غير كرامتي وحقي كانسان وارفع راسي اني مصري في اي مكان وزمان....مبنتكلمش دلوقتي ونقول احنا عملنا حاجه كل كلمنا عن زمان وزمان لما حد بيكلمنا بنقوله دا احنا عملنا زمان ويجي يقول طيب ده زمان ودلوقتي اوطي راسي تاني وابقى عامل زي النعام.........

قول لرجلتك مايدوروش علينا يا ريس ده احنا اصحاب المكان وانتوا اللي شغالين عندنا ملعون ابو الفلوس قدام كرامة الانسان

نفسي اقولك طولت عليك انا اسف لكن بصراحة دي كانت مجرد المقدمه يا ريس

ياجامد ياجامد

على فكرة مجهودي انا يااشرف
ميرسي

لا بجد لو مجهودك انتى تبقى فيرى فيرى نايس بجد موضوع تحفة

اه والله انا هروح اسجله في الشهر العقاري بقى ههههههههههه
بس فعلا مجهودي مجرد حلم حلمته فعلا ونفسي يتحقق زي ماكل احلامي بتحقق بس ممكن يجي اليوم ده ربنا يستر

هههههههههههههههههههههه
روحى بس سجلية فى الشهر العقارى

هو كل الموضوع متجمع من مجموعة من المواقف الماساوية الي بقراها وحبيت اعمل منها موضوع يعني فعلا بيحصل كده في دول الخليج عندهم مصري يعني حاجة وحشة وشتيمة لو قولت انا مصري

يابرنسيسه يا برنسيه يابرنسيسه اهاه

ميرررررسى على الموضوع الحلوة ده

شوفت اهوه ده الي مبوظ البلد احنا بنتكلم في الريس وهو رايح يقولي تامر حسني في حاجة اسمها عمرو دياب هيثم شاكر حماقي كده مش تمورة الامورة


عموما ميرسي برضو

نايس بنت عمي

الله يخليك